Tako Primkop Tagih

Bapa Yose ada pinja doi di Primkop hatu juta bua beli kambi pesta serani ana.Dia musti baya tiap hari sepulu ribu ampe lima bulan.Kalo pinjam hatu juta berarti dia musti beri bale hatu setengah juta.Karena hari minggu jadi petugas primkop te tagih.Bapa Yose ni keriangnya mengae mo buka kebong tanam ubi mo bekaju.Pas malam minggu dia mo pi mengae di pante betemu mo bapa Mike legi dudo tego ara.Bapa Mike po mo pi mengae me legi pemala.bapa Mike cabang dia tego,jadi dia po dudo minom te lupa pi mengae.Dorang dua tabu ara dua boti sampe jam dua.So menganto kena ara pung bua jam dua pegari dia bale.

Esonya bininya Tanta Esi tanya,”temalam dapa ikan ka ne?”.Bapa Yose terpaksa bua aka,”terada le,omba besa ikan po te makan” menyao Bapa Yose.Bininya po tediang.Malam bale misa abi makan dia so siap plastik mo umpa jalan pi mengae legi.Legi tere bero Bapa Mike beterea cabang lobong legi,dia ba dua boti legi.Bapa Yose po campo mo lia ara te lari legi,jadi dudo tego legi.Sampe jam dua bango jalan,tesepa lepa bale rumah.

Pegari bango tanta Esi so langsung buka omong.” Gena? Dapa ikan ka ne temalam?”.Bapa Yose terpaksa bua aka legi.” Angi kera le,omba po mesing besa tero”,bapa Yose bua tuto falta.Tanta Esi  langsung sambo,”kita so dua malam ni lia engko bale jam dua tero,mulo po bau peko kita ciong”.Rupanya,bapa Yose  te tau bininya dua malam bua aka tido pas dia bale.Bininya langsung sambo,”sebenta legi orang primkop datang tagi doi dua hari pung”.Bapa Yose langsug tako,dia musti baya dua pulo ribu.Dia langsung ambe parang cungke pi dara kebong.Sambil jalan dia buka mulo pesan tanta Esi,”kalo dia datang,betau kita legi pi dalam Lewolaga”.

Orang primkop te lama legi sampe.”Tanta eh,om pi ena?”.Tanta Esi karena teceka menyao,”Om tedi betau kalo engko datang suruh iko pi dara kebong”.Jarak kebong pi ruma te sampe lima rato meter,me jalan nae buke.Karena piker Om Yose mo baya,orang primkop po iko pi dara kebong.Bapa Yose dari jao,so lia dia tesembo langsung samba parang gerake nae pohon reo.orang primkop beterea pangge nama,me om Yose te menyao.Napa po panja pende,jadi orang primkop dudo di oring di ba pohon reo yang om Yose nae.Dalam ati dia betau,”dudo reba sebenta dulu,sapa tau te lama legi Om Yose tesembo”.Om Yose data pohon tekan tediang,dalam ati dia cepa bale se.Gegara kanga ranga tanga Om Yose sento di kerengga pung sarang.Kerengga rama,Om Yose lepa parang,data turon pake roso jo.Badan bilo semua.

Orang primkop langsung buka mulo,”eso mau baya ka ne? ka mau sembunyi data pohon legi?”.Kalo te mau baya,eso kita ba mo parang teta pohon reo supaya Om te bisa nae sembunyi legi.Campo mo malu om Yose menyao,”no eh,eso om baya bua tiga hari pung”.Orang primkop langsung sambo,”bae,me eso baya di ruma ka di kebong?”.”Di ruma ka no” menyao om Yose denga muka menta.Dalam ati Om Yose kung-kang,”ini pasti gegara Esi.Mike po orang mo pi mengambo dia para aja lobong tero.

Jakarta,25  Agsutus 2012.

Ditulis oleh : Ebed de Rosary

Disarikan dari ceritera : Elmondo Tobi Dasilva